【黃大仙】德國奧運體操銀牌型男阮馬素（Marcel Nguyen）經常嚟香港做嘢，對香港嘅事物特別有興趣，近日佢又嚟咗香港，喺朋友安排下同女友Damla去咗黃大仙祠拜神求籤。日前下晝4點，阮馬素、Damla、同門藝人楊宇嘉（YY）等一行三人參觀黃大仙祠，未嚟過嘅阮馬素同女友對廟裏面嘅嘢都好有興趣，由門口開始影相留念，見到啲獅子石像、天王像、十二生肖銅像又影又摸，生肖屬兔嘅阮馬素就影兔，鬼咁好奇。
今年大豐收
之後阮馬素佢哋點咗啲香去正殿上香，瞌埋眼好誠心咁求神，仲去埋月老像前綁紅繩，梗係希望感情有好結果啦！雖然阮馬素係德國人，但對求籤好有興趣，最後仲求得上吉籤，Damla就求到中簽，跟住搵埋個識英文嘅解籤阿姐幫手，解籤阿姐話阮馬素屬兔求事業，嚟緊係收成期，8、9月有大收穫，做嘢事半功倍㖭，而Damla就犯太歲，所以畀咗道貴人符佢袋住，叫佢嚟緊唔好投機，結果兩位解籤費加埋道符盛惠65大元。
解完籤後，阮馬素同Damla沿途睇吓風車等飾物，但冇幫襯，其間有幾個粉絲認得阮馬素埋去合照，一行人逗留咗一粒鐘，再行去隔籬嘅龍翔中心地下間百好齋舖食齋。
採訪、攝影：李志明、朱志聰
戲裡戲外，話題最強，立即收睇《動戲場》:
http://hk.movies.nextmedia.com/extra/list/