紐約人今季戰績低迷，但佢哋喺由奧尼爾主持嘅《Shaqtin'A Fool》籃球節目中就長期上榜。呢個節目係取笑球員場內醜態為樂，俾「巨無霸」挑選入榜嘅都唔係好嘢；上周五紐約人作客火箭又爆腦殘事件，JR史密夫唔識拖時間，喺最後19秒3分跳投失利，間接搞到球隊最後輸100:102，睇嚟下星期主角就係JR。
紐約人第一腦殘非中鋒巴蘭尼莫屬，《S》今季已做咗8集，其中有3集係巴蘭尼嘅笑料，包括12月18日作客公鹿一戰，喺第4節最後14秒，紐約人仲領先94:92，球隊搶到進攻籃板，巴蘭尼唔識拖時間，竟立即射3分，炒咗之後俾對手追平，好彩最終經過雙加時，紐約人先以107:101贏波。
「我嘅籃球IQ真係差」
今次作客火箭，腦殘主角就變咗最佳第6人JR；第4節最後2分鐘，紐約人都仲輸5分，靠森柏入3分，加上中鋒真達拿入晒兩個罰球，追成100平手，士氣正盛。最後階段，紐約人控衞烏力治3分射失，真達拿好辛苦搶到進攻籃板，嗰陣剩番廿幾秒，輾轉去到JR手上，按理應該拖到最後幾秒先出手，不過佢竟然立即射3分，連真達拿都喝佢唔住。結果？梗係炒粉啦，之後烏力治搶籃板時侵犯主隊後衞布魯克斯，布魯克斯入晒兩個罰球，就係咁贏紐約人兩分。
JR腦殘事件，網上已被紐約人球迷插爆，賽後佢都死晒狗咁講：「坦白說，當時我以為球隊仲落後兩分，當我聽到真達拿嗌住我嗰陣，我已經出咗手；我嘅籃球IQ真係差。」紐約人上年大除夕已經裁走佢細佬基斯史密夫，JR仲唔生性，小心下個就係佢。
足本收睇《亂噏24》x鄭秀文@杜琪峯；再有卓韻芝！
周一至周五《亂噏24》約定你： http://bit.ly/appletalk24