由國際足協頒發嘅2013金球獎，唔夠兩個禮拜就會揭曉，為咗砌贏兩位強勁對手美斯同列貝利，皇家馬德里球星基斯坦奴朗拿度（C朗）最近已經不斷攬定啲細獎為自己拉票，而佢祖國葡萄牙周二就會頒授佢最高榮譽勳章，以表揚佢喺球壇經常為國爭光。
呢枚「大十字勳章」，係紀念葡萄牙帝國歷史上最重要人物逝世500周年嘅獎項，C朗今次攞獎，仲要係葡國總統席爾瓦親自欽點，擺明幫佢拉票，加埋近期《法國足球》雜誌記者爆料，話C朗鐵定夠票壓倒其他兩位攞金球獎，我求大俠認為𠵱家個勢對C朗真係幾有利，雖然佢唔一定係全年最好，上季歐聯同西甲都冇佢份攞，但整個下半年，佢真係最突出一位。
聖卡斯添丁沖喜
呢邊廂C朗獲總統親自欽點受勳，佢嘅皇馬隊友卡斯拿斯（右）亦人逢喜事，女友莎拉（左）上周五為佢添丁，生咗個男嬰，仲改咗名叫馬田（Martin）喎！我當然祝願榮升人父嘅卡斯拿斯，下半季可以多啲上陣時間啦，但𠵱家正選嘅迪亞高洛迪古斯表現咁穩，我奉勸聖卡斯都係諗吓1月轉會窗可唔可以外借去第二度仲好啦！
足本收睇《亂噏24》x鄭秀文@杜琪峯；再有卓韻芝！
周一至周五《亂噏24》約定你： http://bit.ly/appletalk24