「新年流流唔好咁hea啦！」近排聽見好多人都一人一句話鬼E臣上台唱歌唔落力，hea唱咁話。其實呢hea呢味嘢喺運動場上無日無之，但係每一個落場嘅之所以hea，總有佢背後嘅理由，我哋，邊識咁多呢又！
Hea有兩款，一款主動一款被動。主動嗰味呢，係高手先會用得到，其實你求其上網搵吓阿飛人保特嘅比賽片段都見到，所謂停步，係為了走更長的路，你睇吓阿保特哥哥，每一次喺初賽以至準決賽都好，佢去到最後嗰20米就放軟手腳，收晒步兩手fing fing左望右望咁hea跑過終點，其實觀眾睇見佢咁款都唔係咁like，作為佢嘅對手就更無癮，因為狂追猛跑都追你唔到，輸人不特止仲輸埋個陣，雙重打擊。
但呢隻主動hea嘅背後理由，就係要留多一兩滴精力喺決賽一役，跑少幾步就快啲回復體力。Save the best for last，所以冇人會怪佢咁消極。
另一隻被動hea呢，就係當事人原本冇諗住求其應戰嘅，但係踢吓踢吓發現場波已經冇晒競爭性，一係就贏硬，一係就輸硬，球證未吹雞，但係場波一早已經擺咗入雪櫃，甚至係屠房，呢種情況喺足球同籃球就最容易見到。尤其是NBA，一踏入垃圾時間，就喺觀眾們快手離場嘅時候，主力hea打甚至唔打是常識吧，當今樂壇喺唔少人心目中，可能就係處於呢啲唔湯唔水嘅垃圾時間。
作為一個頂級「運動員」，E臣全力南征北討周遊列國其實搏到盡，對佢嚟講全年巡迴演唱就係英超，係真正見功夫搵真銀嘅比賽時段，而年尾頒獎禮呢，就好似FIFA搞嘅金球獎選舉，純粹就係錦上添花，有就梗係好過冇，但係嗰晚只係嘻嘻哈哈嘅畀面派對，C朗美斯就算盛裝出席都冇佢喺球場上咁charm啦。
只不過喺大眾樂迷嘅眼中，年尾頒獎禮卻已經成為咗4年一度嘅世界盃。平時唔睇波忽然做球迷嘅就係靠睇世界盃去扮球迷，對好多數嘅樂迷包括我，呢啲頒獎禮就變咗全年一聽廣東歌嘅最好機會，雖然我仍然係喺梳化hea住聽，但係你就唔可以hea住唱嘞。這，就是球王的命運。
KEYMAN
now TV主持
足本收睇《亂噏24》x鄭秀文@杜琪峯；再有卓韻芝！
周一至周五《亂噏24》約定你： http://bit.ly/appletalk24