【失控試咪】以前啲人成日話「長江後浪推前浪」，不過睇番𠵱家嘅情況，似乎又未必啱晒！最近啲電影、電視同埋音樂嘅演出，好多時都係啲前輩級搶晒風頭，好似盧海鵬呢啲經典突然變晒做寶，估唔到𠵱家連網上嘅情況都係一樣！
勁過90後
試咪試到街知巷聞嘅鵬哥，喺電影《金雞sss》玩完鄭多燕，跟住喺啲健康食品廣告扮埋籃球員，即刻俾人話勁過啲90後，呢幾日喺網上仲瘋傳咗一段YouTube嘅兩分幾鐘《海天堂盧海鵬失控爆粗片段曝光》片段，片段主要係鵬哥拍龜苓膏電視廣告時一啲冇播出街嘅花絮，最搞笑係鵬哥一句：「龜苓膏冇龜，即係盧海鵬試咪！」成為條片嘅亮點。有啲網民話：「爛口鵬真係次次有呢啲嘢發生！」不過亦都有唔少網民質疑話「係一個宣傳手法」、「頭先睇電視都有播，一睇就笑咗！」至於講到話鵬哥失控爆粗，查實只係一個噱頭，喺開頭嗰陣，聽到一把男聲叫鵬哥講粗口都得，鵬哥聽完話：「成日都話講，我真係講你又話唔得！」事實又證明，唔係靚仔先有賣力，薑真係越老越辣！
場主：守庫
戲裡戲外，話題最強，立即收睇《動戲場》:
http://hk.movies.nextmedia.com/extra/list/