【銅鑼灣】近年較少出現ball場的九巴新抱雷林靜怡，前日同老公、九巴後人雷兆光一齊去咗強國人林立嘅銅鑼灣行街。前日下晝6點，貴婦打扮嘅九巴新抱同身穿西裝嘅老公行街濕平，見到佢哋嘅時候已經有兩袋戰利品喺手，不過兩公婆仲未夠喉，一齊行咗去日本連鎖時裝Uniqlo位於銅鑼灣嘅旗艦店繼續再買。
喊抵叫老公試褲
搭扶手電梯時九巴新抱好窩心咁搭住老公膊頭，當佢哋見到啲衫褲嘅價錢時，九巴新抱猛話好抵，即時揀咗兩條尼龍質地嘅多功能褲畀老公試。老公入咗試身室時，已經行到好攰嘅九巴新抱，已經完全唔顧儀態、強國人上身咁攝咗喺人哋擺衫嘅櫃度坐。
有行過嘅職員見到呢個情形，加上又唔認得佢係乜水，即刻好不屑咁用普通話同九巴新抱講：「這裏不可以坐的。」俾人話仲要俾人當強國人嘅九巴新抱即時彈起身，用流利廣東話解釋，職員見到係自己人，即刻當冇事行開。
臨走執多件羽絨
職員走咗之後，九巴新抱又再坐低玩電話等老公，雷兆光試完多功能褲之後就去排隊畀錢，臨找數之前九巴新抱從遠攞咗件女裝羽絨飛奔去counter找數，之後兩公婆好滿足攞住幾袋戰利品到門口，由司機送返歸。
採訪、攝影：陳辰
足本收睇《亂噏24》x鄭秀文@杜琪峯； 再有卓韻芝！
周一至周五《亂噏24》約定你： http://bit.ly/appletalk24