上季玩完馬後炮，今季就做預言家，同大家一齊睇吓嚟緊周末有咩好睇。今周傾咩：哥迪奧拿的拜仁更強勁？
雖然盛極而衰好似係不變嘅真理，但拜仁（圖）今季搵哥迪奧拿做教練，就係為咗唔想咁快衰住，球會希望用新教練同新戰術去刺激隊波，令到拜仁再創高峯。
睇咗半季，拜仁班德國兵都適應到哥帥嘅風格，幾乎每場比賽都可以控制大局，短傳入滲又可以做到絲絲入扣。喺進攻套路上，哥帥會因應手下球員嘅特性而排陣，冇完全照搬巴塞嘅一套戰術。佢知道拜仁雖然冇美斯，但有洛賓同列貝利呢對世界級翼鋒，所以邊路仍然係拜仁進攻嘅重心，而中路球員不斷換位同後上跑動，幫助邊線發揮最大威力。相比上季，小弟覺得哥帥嘅拜仁更有耐性，進攻部署更加細緻。哥帥唔係用Tiki-Taka去改革拜仁，佢係用Tiki-Taka去提升拜仁。
小弟好佩服哥迪奧拿賞識球員嘅眼光，其中將拿姆改造成防中，呢一着係妙到毫顛。哥帥呢次改造嘅壓力其實好大，首先拿姆係隊長，仲係世界上最頂尖嘅閘位球員，如果改造失敗的話，唔單止拜仁少咗個好球員，哥帥仲要承受德國球迷嘅批評，被人話佢糟蹋咗拿姆。
寫到呢度，小弟覺得盛極而衰呢4個字唔太準確，應該改為盛極而不變則衰。拜仁雖然盛極，但佢哋肯變，所以有機會不衰。文：咖喱
足本收睇《亂噏24》x鄭秀文@杜琪峯；再有卓韻芝！
周一至周五《亂噏24》約定你： http://bit.ly/appletalk24