星期三元旦假期後，環球主要金融市場昨日先開鑼，美元走勢個別發展，舊年表現勇猛嘅歐元就回氣，反而英鎊越戰越勇，曾升穿1.66美元，創逾兩年高位。
雖然聯儲局本月開始縮減買債，理論上係對美元有利，但由於聯儲局表明於2015年前都唔會加息，市場相信新西蘭甚至英國將會爬頭，所以紐元同埋英鎊今年應該可以看高一線。
首先講新西蘭，該國去年可謂諸事不順，唔單止面對澳洲和中國兩大貿易夥伴經濟放緩，仲遇埋旱災同毒奶事件呢類橫禍，但估唔到喺眾多不利因素衝擊下，舊年第三季經濟增速竟然係近四年最勁。據當地官方估計，全年度（截至今年3月）GDP增幅達2.7%，出年就加快至3.6%。
基於經濟加快增長及樓市熾熱，新西蘭擔心通脹惡化，央行近月多次表達今年掉頭加息嘅意向，市場估計最快3月就採取行動，成為首個加息嘅發達國。
值得注意嘅係，縱使新西蘭央行官方利率正處於2.5厘嘅歷史低位，但相對歐美日嘅近零息，紐元係名符其實嘅高息貨幣，加上央行吹風估2015年息口或高見4.75厘，即係未來兩年幾要加息2.25厘，從息口預期因素，淡友開倉將要付出更大代價，單係呢個因素可足以支撐紐元向上。
紐日交叉盤玩得過
另一方面，新西蘭跟澳洲雖然都係商品出口國，但兩者最大分別係，澳洲以鐵礦石等硬商品出口為主，近兩年明顯受到內地需求減弱拖累。
相反，新西蘭出口以奶類等農產品為主，雖然當地去年爆發嘅毒奶事件曾經造成衝擊，但事件已逐漸淡化，只要同類事故唔再發生，喺中國及印度中產增加、內地取消一孩政策刺激下，新西蘭經濟應率先受惠，為紐元帶來上升動能。
策略上，新西蘭今年雖然極有可能加息，但美元有聯儲局縮減買債嘅神功護體，紐元兌美元直盤上升空間有限。以值博率計，玩紐元交叉盤亦是不二之選，可以選擇沽空日圓或澳元。其中去年推介過嘅紐元兌澳元，中線有望上升至0.95水平，而紐元兌日圓就睇90先。
同樣情況亦適用於英鎊，雖然舊年英鎊兌美元僅升唔夠2%，但兌日圓就上升逾23%。
英鎊兌歐日值博
英國《金融時報》就大膽預測，英倫銀行最快今年加息，雖然個人認為今年加息機會唔大，但由於當地經濟加快改善，進展亦遠勝歐元區，所以英鎊兌歐元、日圓仍然可捧，兌日圓今年有望挑戰180，較現水平約有3%上升空間，歐元兌英鎊料下試80，較現價再跌約3.6%。
奇兵
本欄逢周五刊登
足本收睇《亂噏24》x鄭秀文@杜琪峯； 再有卓韻芝！
周一至周五《亂噏24》約定你： http://bit.ly/appletalk24