新年伊始，八方同好多人一樣，都想預測一下自己今年運程。噚日就有一個日本「漢字占卜」網站 http://kkanji.net/ 喺網上瘋傳，當你輸入自己個名後，就會彈出一個代表你喺2014年嘅漢字詞語。狼英過去一年施政推嗰項衰嗰項，元旦即刻有3萬人上街丟佢路姆西，八方用「梁振英」三個字測試，結果就出咗「可憐」兩個字，再輸入「特區政府」，仲出埋「分解」，相反林鄭卻係「絕大」，莫非暗藏天機？
香港人今年好「輕薄」
八方請教日本文化研究人健吾，佢話日本漢字嘅「可憐」同「分解」，意思同中文係完全一樣；至於梁振英等同可憐，佢個人覺得係好合情合理。好打得嘅林鄭今年擔大旗，扶貧、政改都孭重飛，如果政改過到關，首位普選特首仲唔係佢？
八方幫「鄭月娥」測一下字，結果出嚟係「絕大」。健吾話呀，「絕大」係壓倒性咁解，亦可以解釋為擁有絕大嘅支持，唔通係講緊阿爺睇好林鄭，支持佢百分百凌駕狼英管特區？睇怕嚟緊一年，可憐嘅狼英都要臣服喺絕大嘅林鄭之下嘞。
中港矛盾不斷升溫，香港人俾強國人逼到冇碇企，輸入「香港」兩個字，出嚟就係「破棄」；用「香港人」做測試，就出咗「輕薄」兩個字。健吾話，破棄等同放棄，輕薄就係渺小、睇唔起嘅意思；咁樣係咪港人寫照？大家自己參透吓喇！
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange