新年伊始，多個新盤排隊推售，令物業市場氣氛依然暢旺，美聯（1200）老闆黃建業心裏應該有所盤算，上月密密收集美聯股份，一個月內增持七次，涉及金額接近6,000萬元；全年合共斥資1.29億元增持，最新持股15.28%。
黃建業舊年曾估計，樓市將會衰三年，樓價要跌兩至三成，佢亦沽出價值超過4億元嘅物業，真係唔睇好後市咁款。之但係，美聯同物業市場關係密切，樓市唔得，冇理由美聯得㗎喎，黃老闆一邊睇淡樓市，一邊增持公司，認真古怪。
翻查聯交所紀錄，黃老闆2012年都係咁增持美聯，嗰年美聯賺2.5億元，增長86%。
黃老闆舊年不停增持有冇啟示作用呢？還是黃老闆純粹想鞏固股權，事關以港置前高層繆宏邦為首嘅基金Apex，舊年入股美聯7.3%，第二大股東Sun Life持股8%，兩者聯手都威脅到黃老闆喎。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange