貴價茶餐廳翠華（1314）近年搞埋外賣「快翠送」，可惜佢過唔到壓力測試，華華前晚元旦假期喺將軍澳工業邨想打電話落柯打，大時大節預咗多人叫外賣，點知由傍晚6點打到接近7點都打唔通，最終放棄。快翠送好似一啲都唔快趣喎！
查問究竟，翠華CEO駱國安解釋，因為係發展初期，𠵱家全港得十間翠華可做外賣，另有兩間外送中心，每區有一、兩間分店去收電話柯打，未有統一熱線。成區顧客都係打埋同一個冧巴，雖然會飛線落去幾部電話，但都好易就打唔通。
有見及此，駱國安透露，佢哋今年計劃將電話系統中央化，加強配套等等。快翠送家陣喺九龍區已覆蓋到九成地方，港島有六成地方都送到，新界就得個別地區有服務，公司總共有30架電單車負責送外賣，車隊員工並非外判，嚟緊都會增加人手。
足本收睇《亂噏24》x鄭秀文@杜琪峯； 再有卓韻芝！
周一至周五《亂噏24》約定你： http://bit.ly/appletalk24