平安保險（2318）董事長馬明哲舊年跟騰訊（700）老闆馬化騰、阿里巴巴創辦人馬雲合作，「三馬」聯手搞網上保險，開拓互聯網金融市場。
其實三馬既有合作又有競爭，馬明哲近日就向員工透露，將於農曆年前推出移動社交金融服務平台「壹錢包」。
據聞，壹錢包將會包含朋友溝通功能，換言之，都會挑戰騰訊嘅微信同埋阿里巴巴嘅來往。馬明哲內部通知員工，今年會用呢個電子錢包將春節利是派畀大家。內地傳媒引述知情人士話，呢個應用程式將於本月26日出街。
馬化騰跟馬雲原本已經喺網絡世界鬥餐死，馬明哲要鬥埋一份，可以預期有好戲上演。
三馬之中，馬明哲58歲，年紀最大，有「老馬」之稱，馬雲又大過馬化騰，嚟緊馬年真係要拭目以待，睇吓邊隻馬狀態同運氣最好，可以跑得出嘞。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange