上季玩完馬後炮，今季就做預言家，同大家一齊睇吓嚟緊周末有咩好睇。今周傾咩：哥迪奧拿的拜仁更強勁？
2013年，歐洲球壇榮譽應該盡歸拜仁慕尼黑，上月拎埋世冠盃做5冠王，只係比09年巴塞隆拿少一個冠軍，其實以拜仁咁當打嘅陣容，真係睇唔出會下滑，唯一可能始終係哥迪奧拿（圖）。
球迷或者柴我台，09年幫巴塞拎6冠王，咪又係哥帥，呢位賺緊全球最高薪嘅功勳教練，好少會空手而回。小弟亦都唔相信球會結構穩健嘅拜仁會「冧檔」，基本上喺多蒙特頻頻失分下，拜仁差不多篤定衞冕德甲，但最主要的歐聯冠軍，就有點擔心。
歐聯改制後從未有球隊衞冕呢個魔咒，已經夠哥帥驚，09年拎完冠軍，巴塞10年都慘被國際米蘭淘汰，11年先補番中。拜仁16強對手係阿仙奴，基本上阻力不大，怕只怕之後面對巴塞、皇馬、聖日耳門、車路士等對手；特別係車路士，個人感覺摩連奴始終係哥迪奧拿剋星。
另外，拜仁陣容無疑極為完整，但始終都有「山頭」問題，拿姆、舒韋恩史迪加、湯馬士梅拿都算係拜仁「大佬輩」，哥帥要安插自己愛將都唔容易，堤亞高艾簡達拿長傷之前都同球隊格格不入，仲畀德國傳媒狂插；而且拜仁管理層仲有漢尼斯、路明尼加、森馬等「老屎忽」坐住，點會畀哥迪奧拿一個人舞晒成間球會。
講真拜仁主力基本都贏盡球會級比賽，但今年係世界盃年，拜仁集合德國、荷蘭、法國等主力，唔敢講佢地留手，但點都唔想因傷錯過呢個盛事。 文：牽牛
足本收睇《亂噏24》x鄭秀文@杜琪峯；再有卓韻芝！
周一至周五《亂噏24》約定你： http://bit.ly/appletalk24