百仕達（1168）揸住高達40億銀現金，有搞大龍鳳嘅質地，買入博佢兩個憧憬。百仕達嘅內房樓盤所剩無幾，喺冇乜銷售收入同埋增值之下，最新半年純利跌咗九成，得番1,500萬銀，夠cover其中一位高級管理層三年嘅年薪，但百仕達嘅賣點唔喺業績度。
上年6月底，百仕達嘅現金有39億銀，連埋高流動性投資，合共41億銀，扣晒借貸，淨現金及投資都高達38億銀，或每股1.07元，係現價（0.77元）近1.4倍。
百仕達嘅大股東歐亞平，揸住44%股權，歐生應佔權益市值，由2009年嘅32億銀，大縮水咗64%，去到家陣11.4億銀。歐生嘅持股之中，有2.9億股係喺2009年以每股1.87元增持（即總成本5.4億銀），但百仕達現價大潛水60%。
想家底厚番，最常規嘅諗法，係搵辦法去壯大資產或者變身搞新業務，而百仕達勁多銀彈，有搞大製作嘅潛質，係賣點之一。
又以歐生揸住百仕達權益粗略計，應佔上邊淨現金值18億銀，高過佢本人應佔成間百仕達市值11億銀。而歐生前排先辭任百仕達主席職位。
博派高息兼賣殼
忽發奇想，喺冇新搞作下，百仕達若果將淨現金派晒出街，而經除息後，市值分分鐘縮到得番幾千萬銀，兼成為絕佳靚殼，再博大升值（經典殼股萬達商業（169），股價1年大升近9倍），大小股東可能仲着數。博百仕達派高息兼賣殼，係第二個憧憬。
煲百仕達，首站目標睇佢上番每股淨現金值1.07元咁大把，講緊升40%，到時折讓仲有50%。博上邊兩個可能，特別係後一瓣爆出，百仕達升幅，有機會係以倍數計。
錢雋
細價股專家
本欄逢周二、五刊出
足本收睇《亂噏24》x鄭秀文@杜琪峯； 再有卓韻芝！
周一至周五《亂噏24》約定你： http://bit.ly/appletalk24