港股紅盤微升收場，戲肉明顯在半新股市場，瘋狂程度絕對拍得住2007年大牛市。面對如此市況，應該點樣操盤呢？迎合近年強股越強嘅趨勢，唐牛通常會採取破頂追貨策略，噚日若套用喺神州數字（8255）、嘉里物流（636）、康臣葯業（1681）及IGG（8002），回報則非常可觀，戰友不妨參考。
半新股海螺創業（586）噚日搶高3%，再創上市新高，又可以用上述策略炒番轉。咪俾「海螺」兩粒字呃咗，以為公司係主打水泥，其實海螺創業主要經營餘熱發電及垃圾焚燒業務，更將會染指替代型綠色建材，係一隻不折不扣嘅環保概念股。
公司亦透過海螺集團，間接持有海螺水泥（914）及A股海螺型材分別約19%及16%權益。彭博綜合券商預測，海螺創業今年市盈率僅17倍，以環保概念股嚟講，絕對係超值，加上又係冇蟹貨一族，要舞上話都冇咁易。
星美升勢有餘未盡
同場加映電影股星美（198），旗下星美匯數碼體驗館剛於北京揭幕，主力銷售數碼產品，並以「線上訂購、線下取貨」模式經營，完全食正網購熱，連華為嘅最新款手機「榮耀3C」都有得賣，難怪噚日大成交炒上8%，升勢似有餘未盡，值得望多兩眼。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange