【天后→銅鑼灣】懷胎8個幾月、現年43歲嘅洪欣興奮等待馬年BB出世，大前晚8點幾佢同老公張丹峰、同前男友莫少聰所生嘅囝囝張浩鋒（前名莫鎬廉）喺天后出現，雖然臨盆在即，但洪欣個肚都未算好巨，不過素顏嘅佢塊面圓碌碌，睇嚟進補得好好，愛妻號張丹峰幫老婆拎手袋，免大肚婆操勞，認真體貼。
除夕夜洪欣一家三口都着紅色襯到絕，洪欣着紅褲襯紅鞋，張丹峰着紅羽絨，囝囝就着紅衫，真係喜氣洋洋，佢哋邊行邊指指點點商量食乜嘢好，最後揀咗間糖水舖，由於囝囝同老公點嘅糖水先到，洪欣忍唔住分杯羹，三人最終食咗四碗糖水。
乖仔聽阿媽話
之後佢哋行去銅鑼灣維園諗住睇工展會，點知行錯去出口，而售票處就要行好遠，洪欣因為大肚攰唔想行，佢話：「算啦，第二晚行過。」囝囝聽到即刻扁嘴，但都聽媽咪話冇堅持，跟住佢哋又去搵食，三人行去附近食清湯腩，睇嚟大肚婆洪欣胃口好好，唔夠半粒鐘又食第二餐。前日朝早，張丹峰仲喺微博貼同老婆嘅恩愛相祝福粉絲健健康康㖭。
採訪、攝影：徐錦池、楊浩賢、畢紹基
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！