【本報訊】踏入2014年首個港股交易日，市場隨即上演一幕天堂與地獄。鍾情強勢股的投資者突然變得亢奮，令半新股越炒越瘋，中資股則繼續大藥煲，兩極化情況較去年進一步加劇，其中神州數字（8255）及嘉里物流（636）開市升到收市，單日埋單瘋漲44%及16%，亦帶挈同業呈強勢。基金相信，縱然半新股有炒過龍憂慮，惟值博率仍較中資股高，「一日A股唔得，一日呢啲股都仲有得炒」。
記者：林 靜 陳承龍
市場炒新股炒到不亦樂乎，於相關股份欠缺正面消息之下，昨日資金仍不問價瘋搶，有市場人士更形容炒作半新股及強勢股的盛況，似足07年熱炒「港股直通車」時的迷你版。
神州數字單日爆升44%
豐盛金融資產管理董事黃國英認為，半新股無蟹貨又有概念，加上部份大戶在科網、濠賭股贏大錢，「唔會介意拎啲散紙出嚟買吓呢啲嘢」，因而觸發半新股大升市。不過，他指昨日炒風「太癲」，故趁高沽出手上部份嘉里物流，「因為天堂股嘅值博率，都會跟隨價格下降……但都唔使想像佢會突然間冧樓，相比買兗煤（1171）就死咗好耐啦，買呢啲要起碼有一線生機。」
多隻上市不久的新股反覆破頂試新高，以上月4日配售上市的神州數字最勁，全日升44.1%，以3.3元的接近全日最高位收市，成交額1.84億元達到市值的11.6%。該股上市時以每股0.6元作配售，掛牌首日已較配股價升15%，自上月中突破1元關後再添動力，最近四個交易日升逾1.8倍，猶如脫韁野馬。
除全配售新股表現凌厲外，多隻透過公開發售上市的新股也造好，上月19日上市的嘉里物流，上市初段平平無奇，但到掛牌第六日（本周一）終於發力，近三個交易日共升25.4%，最後同樣以接近全日最高位收市，收報12.82元，升16.3%。
四股打入20大成交
至於9月上市的中滔環保（1363），上月中旬由4.18元急回至12月23日的2.95元，以為氣數已盡，股價忽然於當日見底，然後連日爆升，昨日一度挑戰5元不果，收市仍狂漲23.2%，至4.78元。而昨日20大成交金額股份當中，嘉里物流、信達（1359）、中滔及信義光能（968）均榜上有名。
其他半新股方面，屬於當炒的科網及醫藥板塊的，同樣有睇頭，IGG（8002）、環亞智富（1390）及康臣葯業（1681）昨分別漲12.6%、7.2%、21.7%。
另外，本報昨走訪中環證券行，發現假期後交投氣氛持續淡靜，惟經紀呂先生直言，不少客戶已轉在半新股尋寶，未有理會大市走勢。建銀國際證券研究部董事總經理蘇國堅表示，半新股的飆升主要是資金炒落後，因為大部份新股上市價均有一定折讓，只要市場消化上市初段回吐出來的貨源後，「佢哋就會上㗎嘞」。
【散戶意見】
低撈出口股
文小姐：「紅盤表現冇失望，啲基金應該仲玩梗未放完假，或者過幾日會上番去，今年唔係好淡。不過舊年麻麻哋，年頭贏咗年尾又畀番佢，運桔，仲要蝕錢收場做咗世界『損手』，𠵱家諗住吼低位買啲出口股，希望賺番一成。」
科網炒波幅
李小姐：「舊年個市上上落落，左一巴右一巴好難贏到佢錢，自己炒波幅有5%至6%回報，算係追到通脹。今年諗住走勢同舊年一樣，所以會吼吓科網嚟炒，炒咗年幾都唔見佢大跌，𠵱家又係科網世界，應該仲可以升。」
【網民洗版】
姑池迷：
隻隻半新股想鬥快番（翻）一番!!!!!!
theoneman：
夠鐘買藥食，康臣大爆升
crycry627：
事實上，真係玩緊接火捧，睇下幾時同邊個唔好彩啫
marychin ：
中咗老虎機，係咁出錢，呵呵
archi0000：
我估700會見$700，不要問，係一d人類對數字ge一些追求
資料來源：香港討論區、Uwants討論區
足本收睇《亂噏24》x鄭秀文@杜琪峯； 再有卓韻芝！
周一至周五《亂噏24》約定你： http://bit.ly/appletalk24