前日元旦好多人帶埋諷刺「狼英」嘅路姆西上街遊行。歌神許冠傑（Sam）都有留意呢隻公仔，仲大讚路姆西融入香港文化：「雖然隻公仔嚟自瑞典，但香港人賦予一種自由反叛嘅意思畀佢，成功融入香港文化，件事幾啱我首歌《有酒今朝醉》嘅歌詞，『人哋窒兩句，濕濕碎，我都骨聲吞咗佢。』」
珍惜身邊人
阿Sam今年4月18至20號喺紅館舉行「What a Wonderful World演唱會」，過往阿Sam啲歌好鍾意諷刺時弊，04年復出開個唱，作咗《繼續微笑》為受沙士困擾嘅人打氣，近期香港咁多怨氣，會唔會寫首歌幫市民打氣？佢話：「會為患病嘅小朋友寫首新歌，雖然佢哋一路要同病魔搏鬥，但能夠用單純樂觀嘅心面對困難，近年香港好多爭拗，望吓身邊，其實有好多美好嘅人同事去珍惜。」
阿Sam早排去咗夏威夷重拍《何處覓蓬萊》MV同影海報，點解揀夏威夷？佢話：「夏威夷係我太太嘅家鄉，間中都會同佢返去，有親切感，令我放鬆心情。」
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！