最近梁振英銷聲匿迹，加上中央出手安撫維基，成功令梁特首民望低位反彈。梁特低調，另一原因係施政報告臨近，正密鑼緊鼓由上而下，要求各政策局交單，實行狂派谷民望。舊年本來已打算開倉，但手執資源分配大鎖匙之財爺曾俊華唔多賣賬，結果令到佢首份施政報告出閘脫腳，提振民望不成之餘，仲反覆向下。
林鄭出招扶貧 搶先得分
今年再接再厲，但又被兩位司長左右夾擊，第一擊來自民望高企之林鄭司長，林鄭手執扶貧大權，親信羅致光又係關愛基金當權派，早前宣佈派3,500元畀N無人士，政務官為之側目。因N無人士屬低收入家庭生活津貼，乃全新政策，本應要經正常決策程序，即政策委員會、行政會議，再去問財政司bid錢，最後去立法會財委會申請撥款。由於政策上違反現行三條支柱安全網，要經反覆討論，但林鄭醒目，始終出身官僚集團，摸通門路，利用羅致光作先鋒，由關愛基金先行負責派錢，而當關愛基金乾塘後，自然逼住由政府經常開支吸納。政策上繞過衞福局官僚及財政司chair嘅資源分配會議Resource Allocation Exercise，又搶在梁振英施政報告前推出，自己得分。而關愛基金昨日起開始接受非公屋、非綜援低收入住戶一次過生活津貼申請，快、靚、正。堂堂一項重要政策轉變，一個會導致福利經常開支上升嘅大閘，就咁畀林鄭暗中過關。
本來呢啲筍嘢，按政府不成文規定，理應由1月份梁特首發表之施政報告宣佈，毋須搶先一個月公佈，即使2月才接受申請，也可day back至2014年1月1日，林鄭私心，官場有目共睹。至於另一邊廂，財爺繼續一貫作風，最近公開警告，指香港公共開支不斷上升，終有一天需要動用儲備支持，而儲備亦總有用完的一天，屆時政府或以透過加稅或發債增加收入。
呢番說話表面上係期望管理，但又似係制止梁振英狂派計劃，先小人後君子，聲明在先，唔贊成狂派亂派。左右夾擊下，梁特只有求助北京，12月底述職，帶班局長上去，就係要聽取中央挺港具體措施安排。
中央畀政策，但遠水救不了近火，筍嘢好似資助N無，林鄭粒聲唔出就先公佈，今年隨時又同舊年一樣，到梁振英手上時施政派糖項目所餘無幾，一出台就比人噓！
添馬男
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange