【13叱咤頒獎典禮】商台前晚的「2013年度叱咤樂壇頒獎典禮」頒足近四粒鐘到凌晨12點02分才完場，不但部份賽果離奇，歌手致謝辭又長又冗，「五奇五悶」睇到觀眾謝皮！狂掃五獎的大贏家陳奕迅都覺悶，在慶功宴上玩拋獎又扮殭屍解悶，玩到至尊唱片獎項都崩了一角。
撰文：皓騫
五奇：
1.何韻詩奇贏我最喜愛的女歌手
楊千嬅前晚缺席頒獎禮，容祖兒以為終可開齋攞硬喜愛女歌手，商台卻給了何韻詩，阿詩冇歌曲獎卻贏此獎被質疑種票。
2.陳詠謙奇贏填詞人大獎
曾為李克勤寫膠歌《姐姐》的陳詠謙，竟撼低大師級林夕和黃偉文（右圖）獲獎。陳詠謙是黃偉文旗下公司填詞人，他致辭時多謝黃偉文，台下的黃偉文淚流披面，不知是心酸還是感動呢！
3.周柏豪奇贏唱作人金獎
大文豪周柏豪（左）奪唱作人金獎，相信跟勁敵方大同、王菀之去年少唱作歌，他才冷手執個熱煎堆，加上商台愛捧二線歌手，擸三獎的柏豪明顯是商台新寵。
4.許廷鏗奇贏男歌手銅獎
出道三年的許廷鏗竟撼低許志安、梁漢文獲叱咤男歌手銅獎，甚至有份跟Eason入圍我最喜愛的男歌手五強，難怪Eason都嘲自己好似留班了！
5.Supper Moment奇入圍我最喜愛歌曲五強
低人氣樂隊Supper Moment《無盡》竟打入五強，越級挑戰Eason《任我行》爭獎，最後Supper Moment以942票輸給獲2,405票的Eason。
五悶：
1.歌手致辭冗長悶
歌手致辭長又悶，有份製造悶場講足十分鐘的Eason多謝作曲填詞老婆囡囡，連新人J. Arie和組合Robynn & Kendy都講到唔斷氣。
2.歌手打扮悶
往年歌手上叱咤都奇裝打扮鬥出位，但今年女歌手個個低胸露事業線悶爆，男歌手就大部份黑沉沉，王菀之化妝似燒豬，新人AGA將叱咤logo着上身擦鞋。
3.DJ間場悶
開場由軟硬天師攞路姆西講棟篤笑，之後承接唔到氣氛，朱薰、細So間場說話悶爆又冇point，將《青春頌》tag到去青春痘超無聊。
4.年年同一班人悶
Eason攞足十年叱咤男歌手金獎，容祖兒就是九連霸女歌手金獎，十年前後都是他們玩晒叱咤，雖然兩人實力毋庸置疑，但就毫無新意囉。
5.節目沉悶
前晚44個獎頒足近四粒鐘，不止觀眾睇得辛苦，連Eason完騷後都呻：「都覺有啲悶，同期歌手好似千嬅、基仔（古巨基）、中基唔喺度，梁漢文同蘇永康又隔開咗坐。」
足本收睇《亂噏24》x鄭秀文@杜琪峯；再有卓韻芝！
周一至周五《亂噏24》約定你： http://bit.ly/appletalk24