元旦日，唔少市民上街遊行，希望表態爭普選後，特區以後唔會行衰運。除咗遊行，好多市民都參加埋佔中嘅全民投票，希望政府知道市民嘅心意，政界中人響應投票者都唔少，雖則啲題目被認定「阿媽係女人」，但佢哋都認為要積極表態，當然各自嘅投票選擇同心情，就截然不同嘞。
民主黨劉慧卿同公民黨余若薇兩位民主女將，異口同聲話三條問題都投贊成，事關怕出到嚟結果若然係棄權同反對佔多，北京就會亂解釋港人意願。余大狀提醒大家有樣嘢叫人大釋法，可以扭曲阿媽唔係女人，所以都係講清講楚好啲。
「公投唔係咁搞法」
工黨何秀蘭就話，特首提名冇篩選係顯淺不過嘅道理，但係京官都會用「機構提名、集體意志」滲入進行篩選，藉此話畀港人知「阿媽唔能夠、唔可以係女人」，所以佢話「就算阿媽係女人嘅問題，都要問！話畀北京知，阿媽係女人呢個事實，不能改變。」但佢因為唔想認可提委會，所以第一條投棄權。
向來唔跟主流嘅保自聯韓連山，同樣批三條問題係假命題：「我好無奈，佔中三子點會出個咁樣嘅公投題目？」但佢話唔想俾政府有位入，最終含淚投晒贊成票。
學民思潮周庭話除咗第二條問題答贊成，其餘兩條揀唔落手，因為條題「唔知想點」。咁難揀可能佢都慶幸自己未夠18歲，大條道理唔使投。社民連長毛就夠晒秤，但佢都唔投，事關佢覺得公投唔係咁搞法，話辭職引發變相公投就最好。
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange