喺紅館舉行緊演唱會嘅容祖兒,前晚大除夕延遲至近10點開騷同觀眾一齊倒數,不過男朋友劉浩龍前晚要去澳門做倒數活動,唔可以喺紅館陪住,不過佢不忘喺微博叫入場睇騷嘅觀眾:「你哋今晚要畀最好的反應佢呀知唔知道?」真係好錫女友。
感激男友照顧
但踏入新一年,祖兒噚日一早要去醫院睇醫生,佢喺微博貼咗張藥丸相:「2014新年快樂,無懼咽喉炎氣管炎感冒菌全身菌跑,感激(公仔豬樣)爬起身車我到醫院,更衷心感激我的耳鼻嗰醫生黃雅信一月一號為我應診,醫者父母心,我代我的觀眾多謝你,各位,針已打,藥已服,nothing can fight me down(冇嘢可以打低我)。」好明顯祖兒嗰隻豬公仔係指劉浩龍。不過祖兒呢句英文認真地道港式,擺明直譯,正統應寫成「nothing can defeat/beat me.」先啱,唔會用fight。
至於前晚祖兒喺個唱上依然落力演出,但尾聲唱《加大力度》時就唔小心俾個舞蹈員隻手撞到個嘴,整損咗少少。另外祖兒唱《16號愛人》時好感動同滿足話:「作為歌手,擁有咁嘅晚上,已經好足夠。」
撰文:馮仁昭
戲裡戲外,話題最強,立即收睇《動戲場》:
http://hk.movies.nextmedia.com/extra/list/