上一代球王朗拿甸奴已經就嚟34歲，之但係佢寶刀未老，近幾年返巴西依然有貨賣，仲啱啱獲選為2013年度南美足球先生。球迷唔好以為「細哨」諗住喺祖家踢到收山，查實佢同明尼路已經約滿，據報仲有打算再戰歐洲球壇；土耳其球會比錫達斯已經同細哨代表密密斟，希望可以簽到佢加盟。
壓尼馬做南美足球先生
朗拿甸奴喺11年1月離開AC米蘭轉投法林明高，一年幾後過檔另一支巴甲球會明尼路，結果喺上年大豐收，帶領隊波贏到南美自由盃冠軍。雖然明尼路喺上個月嘅世冠盃表現麻麻只得季軍，但細哨嘅表現都得到認同，由烏拉圭《國家報》評選嘅南美足球先生，朗拿甸奴力壓已經離開咗山度士、踢緊巴塞嘅尼馬，以及第3名效力阿甲紐維爾舊生嘅麥斯洛迪古斯當選。
踏入2014年第1日，亦係朗拿甸奴同明尼路約滿嘅日子，換言之佢可以自由同任何球會傾加盟事宜。到今年3月細哨就滿34歲，不過佢仲未諗過咁快退休，喺上年仲講過話希望可以搏埋最後一鋪，睇吓可唔可以搭到世盃尾班車，所以呢半年何去何從對佢嚟講好緊要，有機會可以返去歐洲球壇，增加曝光率都係相當唔錯嘅選擇。
土媒爆將加盟比錫達斯
據土耳其傳媒爆料，話土超球隊比錫達斯希望可以簽到細哨，球會副主席施比爾亦已經同細哨大佬兼經理人阿斯斯傾掂數，同意咗一份兩年總值600萬歐元嘅合約，喺未來幾日內就會正式公開宣佈呢單交易。
阿斯斯暫時都未證實消息，而比錫達斯方面就有位高層漏啲口風：「比錫達斯有打算簽朗拿甸奴，不過佢年薪太高係一個障礙，我哋要搵到贊助商幫手先可以成事。」照咁睇，比錫達斯已經搵到水喉，令朗拿甸奴回歸歐洲球壇指日可待。無可否認，細哨係高峯已過，不過技術仲喺度，只要有鬥心去踢嘅話，我求大俠認為佢一定仲有料到。另外，據講比錫達斯都想簽埋曼城守將尼史葛，希望加強實力爭取重奪土超錦標。
足本收睇《亂噏24》x劉嘉玲； 鄭秀文@杜琪峯再度登場！
周一至周五《亂噏24》約定你： http://bit.ly/appletalk24