商台叱咤樂壇頒獎典禮賽果今晚喺灣仔會展揭盅，馮仁昭收到風，陳奕迅（Eason）起碼狂掃4個獎成為獎王，包括破紀錄十奪叱咤男歌手金獎、至尊歌曲、我最喜愛男歌手同我最喜愛歌曲，而至尊碟就係Eason同容祖兒之爭，如果Eason擸埋至尊碟就以5獎稱霸。
消息指男歌手三甲係Eason、周柏豪、許志安，女歌手三甲係祖兒、薛凱琪、王菀之，組合三甲係C AllStar、Supper Moment、Robynn & Kendy，唱作歌手係藍奕邦、周柏豪、盧凱彤；叱咤十大歌曲得主就係Eason、李克勤、許廷鏗、周柏豪、許志安、連詩雅、王菀之、祖兒同C AllStar等。
「冇預時間去」
同商台反咗面嘅鄧紫棋（G.E.M.），舊年冇歌上到叱咤榜，今晚自動消失唔去頒獎禮，佢噚日喺電話度話：「喺澳門跨年，聽日（指今日）就算返港都搵朋友食飯，有冇獎都冇預時間去。」係咪唔使畀面商台？佢話：「冇歌上榜，唔知叱咤做緊乜嘢，我哋有派歌，但完全冇播。」覺得叱咤唔公平？佢話：「我上年表態咗，態度冇變，唔出席係最大表示，唔想嘥口水每年講一次。」
柏豪挑機Eason角逐叱咤男歌手，柏豪噚日喺商台訪問度話：「我仲差好遠，但可以同神級偶像出席同一個頒獎禮已經好開心。」
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！