葉楚航上季出盡飲奶力攞咗個冠軍，後遺症當然係好多馬評分急升，今季好難再有突破。
其中「隨心隨意」上季5W，今季加到100分起步，跑過兩場都係三三四四，似乎評分到咗樽頸位。但各位唔好忘記，葉楚航喺暑期接受訪問時講過，今季最大心願係可以帶領「隨心隨意」遠征日本安田，既然有呢個大計，即係話「隨心隨意」目前100分肯定仲未盡。睇番隻馬今季兩場走勢，初出未熱身後上不及跑第四，表面睇似乎一般，但其實末段爆21秒92，係全場爆得最勁一駒。上次初跑1600，全程外叠望空，唔輸就有鬼嘞，但亦跑到第三喎。今次縮番落1400，只係孭113磅，韋達造唔到磅換上田泰安，專心爆一段可能發揮得仲好，睇吓航哥可唔可以捧走華商會盃。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange