這是2013年倒數中的香港。繁華盛世。恒指徘徊二萬三千點。
然後我看見有人為了一餐飯而行騙。
他的頭髮似乎是用幾天無梳洗的頭油gel出來，臉容瘦得像OL愛煞的錐子臉；穿着一件紅色大風褸，內裏只有一件黑色底衫。牛仔褲下毫無懸念的踩着一對人字拖鞋，只能是拖鞋，如果是波鞋，便破壞了他的造型。不要問年紀，我相信他不希望記得已經活了幾個年頭。
紅衣男人，和快餐店職員激烈爭辯。
「我朋友幫我嗌咗個飯，跟住我坐低，轉頭出去拎杯水，返嚟就成個餐俾你地同事收咗啦。我食都未食過。你賠番個餐俾我。」
快餐店職員一臉為難，似乎是考慮該不該馬上踢爆對方的謊言。
「先生，我就肯定無收過你個餐。」「係我朋友幫我買㗎個飯。」「先生，咁你朋友喺邊？」「我個飯食都無食過就無咗嘞！」
職員似乎不想再玩這個遊戲，把紅衣男人轉介經理。
「經埋，我朋友頭先幫我買咗個飯……」「先生，咁你朋友喺邊？」「佢……行開咗啦。」「咁我地幫唔到你，亦唔可能俾個飯你。唔好意思。」「咁點啊……咁……即係當我唔好彩啊？」紅衣男人嚷嚷，但根本無人理睬，只好悻悻然離開。
「佢邊有咩朋友啊？想呃飯食之嘛。」經理扁扁嘴。
我想像這個紅衣男人，是否每天都在不同快餐店作古仔碰運氣？他有成功過嗎？還是他這身窮酸打扮過早劇透了騙局？如果他的行騙劇本一直sell唔出，他下一步會搶嗎？還是連作古仔的心思都省回，直接加入撿拾剩飯剩菜的行列？他有試過搵工嗎？打工睇老板臉色的辛苦，和呃飯食被識穿的難堪，那個更不好受？
2014年，我希望這位紅衣男人口中的「幫我買飯的朋友」，快快出現吧。