近日美國傳媒踢爆，熱火後衞獲迪又生多咗個仔，但係媽媽唔係佢早前求婚成功嘅明星未婚妻嘉比雅！而呢位3個小朋友嘅爸爸，日前亦都證實確有其事，仲已經見過個小朋友。獲迪認得咁爽，真係唔怕會俾未來老婆扭耳仔？
嘉比雅一早就知
獲迪曾經喺上年9月上名嘴Jay Leno節目，話自己曾經同嘉比雅分開過一短小時間，不過最終兩個人都喺番埋一齊，早排仲訂埋婚，準備今年9月拉埋天窗。不過，傳出喜訊之後，美國娛樂雜誌《Entertainment Weekly》（EW）收到風，話獲迪又做老竇，但係媽媽就唔係未婚妻。
佢周一面對傳媒圍訪，證實消息：「我同嘉比雅分開嘅期間，喺我人生低谷收到一個祝福，一個男仔好健康咁出世。」獲迪仲話呢個小朋友已經有一個月大，同埋已經見過佢：「我得到一個機會去見佢。就算呢個小朋友唔係同我一齊住，我都會盡辦法去見佢。」咁佢本宣揚父愛嘅自傳，會唔會因為咁而受影響，獲迪就話盡父親責任，本書一樣可信。EW話獲迪同私生子嘅生母已經認識多年，嘉比雅仲知道呢位二奶嘅存在。早前二人分開可能就係因為呢件事，不過最後和解，睇嚟獲迪落咗唔少嘴頭。
至於熱火周一作客金塊，獲迪打咗半場就因背傷而退下火線，不過好在有29歲生日嘅勒邦占士，貢獻26分同10次助攻，帶領球隊以97:94反勝。
足本收睇《亂噏24》x劉嘉玲； 鄭秀文@杜琪峯再度登場！
周一至周五《亂噏24》約定你： http://bit.ly/appletalk24