寫稿交稿，日日如是，寫到今日，已是2014年的新開始，時間過得咁鬼快，有啲驚驚地，大概年紀愈大，就愈覺得時間過得快，問一個十七八歲嘅中學生，佢會覺得三十歲係遙不可及之事。
2014會發生乜嘢事，今日係一月一日，好難預測，前年十二月三十一日，恒生指數係22652點，2013年一月二日，恒指大升655點，升至23311，升咗2.89%，之後成個2013年一月，股市係咁升，當時如果有人夠膽話「升完咯，沽貨獲利離場！」一定俾人恥笑，點會估得到2013年年底，恒指仍然在23300點浮動，與年頭相比，幾乎係原地踏步，財經演員掛在口邊嘅術語有波幅，冇升幅，就係咁解。
市道如此難預測，2014年政治局勢更難評估。本地方面，政改不知如何收場，佔中如何發展下去，建制派、當權派、泛民主派嘅心中都冇個底，如果緊跟中央指示嘅話，根本就不必諮詢，搞個鳥籠提名委員會出來就算數，對中央來講，任何沒有篩選的入閘提名都有風險，必須反對，就如泰國民主黨堅決反對今年二月大選，堅持成立一個協商形式嘅人民議會一樣，如果香港民主派向泰國民主黨學習，中央會無任歡迎。
本地政治局勢難料，國際形勢暗藏危機，日本安倍晉三嘅政治夢想係要修改日本憲法，成立日本三軍，擺脫自衛隊之名，不知何時會癲起嚟，在釣魚島與中國擦槍走火，重演120年前甲午戰爭，試試中共海軍解放軍是否即是清代北洋水師。（註：解放軍名義上是隸屬中國共產黨的，不是屬於中華人民共和國政府的。）2014甲午之年，午火可焚甲木，有以下犯上嘅可能，如安倍晉三不能自制，渴求歷史留名的話，中日交惡，幾有可能，對亞洲經濟不利。在中國而言，習近平上台後，統攬黨軍政大權於一身，比胡錦濤遠為高調，李克強比溫家寶更似聽話的管家掌櫃；中國威權政治日益明顯，民間自由度會被壓下來，中國政治民主化提也不用提，在此情況下，習近平掛帥出任「全面深化改革小組」組長，都不知會深化改出甚麼結果來，既得利益團體，不屬於習派的，必受「改革」（例如周永康石油幫），內裏隱藏不少unknown unknowns。