考吓大家，現役有個「龍」字嘅馬，究竟有幾多匹？唔使查喇即刻開估，一共有56匹咁多。隨時咁啱得蹺，一場七八條龍上陣，咁就真係大排長「龍」咯！
今次嘅「龍」字馬中，有唔少機會相當高，好似第四場「赤龍駒」，隻馬前仗贏得有幾精采，大家應記憶猶新，上仗落敗回一回氣消化咗加分後，今場用到韋達，睇嚟又可重拾升軌。又好似第七場「皇龍寶駒」，今季曾經同「共創美好」串Q，家陣喺四班排四檔，肯定有着數，而且增程跑1600米一定啱。點解？佢爸爸喺日本原來贏到3600米，咁你話1600米點可能嫌長。仲有第二場「瀟洒勁龍」，上仗跑第二走勢相當好，練馬師李易達啱啱有隻「齊得戚」戰死沙場，兵力越來越少，難得「瀟洒勁龍」抽四檔柏寳又肯騎，為咗馬房前途着途，梗係砌盡啦！今期係2014年第一戰，大家如果想行運一條龍，就唔好錯過呢三條「龍」喇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange