【內地股市】
內地股市去年見紅，相對其他環球主要股市，可謂輸足九條街。市場原先對三中全會有無限憧憬，股市的確亦有過一輪升勢，可惜有頭威冇尾陣，基金經理對內地改革存有疑問，預期A股今年難望翻身。
鄺樂天指改革是要既有利益行業讓路，以及市場運作高透明及有效率，意味要針對大藍籌，這對股市不是好事，長遠才可見明顯影響，「改革年唔等於大升市，只係將舊有問題改變，對市場只係一個平衡影響。」以估值看，雖然A股不算貴，但其實又難言是便宜，「佢折讓嘅原因主要係內銀，但如抽走呢個因素，其實又唔特別平。」
雷賢達：需10年復原
雷賢達認為，股市瘋狂過後一般都要10年時間回復元氣，A股自2007年高位回落，至今仍未10年，「呢啲（大牛市）係10年見一次，嗰次之後好傷」，僅在2009年彈一彈，但之後仍回落，他認為2007年A股市場跟1973年港股情況相似，「由幾百點升到1700點 ，再由1700點跌回百幾點。」他預期，今年A股資金將會聚焦新股市場。
陳栢鉅指，中國過去20年已不斷改革，但目前是內部改革，與當年鄧小平旨在將區內生產吸引到中國的情況不同，實行起來會困難重重，且步伐緩慢，「要國企賺少啲，銀行利息高啲，但整體利潤無變，個餅冇大得咁快，僧多粥不變，唔覺得可以做嘅嘢有幾多。」他又指，A股市場對改革冇反應，但創業板卻持續走強，反映內地投資者已不再相信傳統行業，與外資取態相反，「以多年嘅經驗，內地投資者通常都係啱嘅，因為佢哋近過我哋。」
看好中國股市的王浩同意，執行改革要很長時間執行，例如一孩政策放寬，需要很多配套才能成事，他認為只有在全球衰退的環境下，中央才會放棄改革計劃，否則會持續執行，但需時會很長。他認為，結構上中國「行錯路」8至10年，未來改革應會上軌道。
足本收睇《亂噏24》x劉嘉玲； 鄭秀文@杜琪峯再度登場！
周一至周五《亂噏24》約定你： http://bit.ly/appletalk24