今年10月15日前，電視觀眾只能邊哼「在世間遮風擋雨有一種愛」邊眼冤；「一男子」全名未必寫得出；家中收費電視原來可直播議事堂激辯也不知道。
感謝梁振英政府再次出手團結巿民，連結「平行時空」，驚醒了本來沉睡中的人，氣得師奶要上街抗爭，導演編劇要絕食，演員無戲可拍要示威，難怪連港視主席王維基也選梁振英為2013年風雲人物。
一句「你唔好激嬲我！」盡顯霸氣的王維基，在2013年最後兩個月，帶領香港電視員工把荒誕劇轉為勵志劇。10月被拒發免費電視牌後，社交網站的「撐港視」專頁like數以火箭速度上升，先後引發12萬人上街、十壯士絕食、10萬人政總集會，撐到立法會權力及特權法被否決。之後顧問公司及通訊局向「一男子掌嘴」。巿民絕望，王維基卻在聖誕前夕公佈「plan B」，購入流動電視頻道，振奮人心。
牽動觀眾情緒60多天的王維基向《蘋果》表示，2013年風雲人物絕非他本人，「風雲人物梗係我哋特首梁振英先生啦，所有香港嘅事都係佢搞出嚟」。他指免費電視風波之後，公眾對港視期望更高。他的新年願望是希望港視製作優質節目讓市民欣賞，「全香港觀眾攞顯微鏡望住我哋嘅節目，一啲都唔可以馬虎」。
王維基勉勵港視員工要努力工作，為香港爭光，「希望我哋嘅創意工業好似以前咁，為香港人帶嚟驕傲」。
艾威：喚醒了對公義的堅持
香港電視旗下藝人艾威形容，整件事本來是荒誕悲劇，其後出乎意料變成勵志劇，全賴主角絕地反擊。回首當初不獲發牌，艾威形容是匪夷所思，跟香港有海嘯一樣令人難以置信。為討回公道，他的生活出現重大改變，「以前覺得政府做嘅嘢一定係啱㗎嘛，參加大型政府戶外function，一定係反吸毒、反貪污、反罪惡，一定係啱嘅嘢，估唔到我哋嗰次咁多人喺政府總部反政府，你話幾荒謬。」
他一度計劃參與梁振英的地區諮詢會，賦閒時又驚覺家中的收費電視原來有直播立法會的頻道，「我自己都唔知有個咁嘅台，立法會存在咁大問題，啲人話唔贊成唔發牌，話要將答案查到水落石出，但之後又投票反對，佢好似當冇人睇到咁，出嚟仲好理直氣壯，我真係好想知道佢點做民選議員」。
經歷百劫，艾威將於短期內復拍劇集《天網》，他指雖然電視台死而復生，但之前所受的挫折喚醒了他對社會民生的關注及對公義的堅持，直言過往付出不足，「好慚愧以前冇投票，𠵱家知道咗，雖然小小一票，對我哋切身關係好大」。
他表明會繼續要求政府就發牌問題提出合理解釋，「仲會留意吓政改，政改諮詢我仲有好多嘢唔明，想搵人補習吓，要知道囉，𠵱家會關心多啲」。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange