雷霆雖然早前有控衞韋斯卜克，因為膝傷做手術而要唞到明星賽周末後，但係一班球員打得依然有火，周日憑杜蘭特個人獨得33分，主場以117:86怒炒毫無手感嘅火箭，取得潮韋傷出後嘅第2場勝仗！
照炒火箭31分
雖然潮韋有排都唔出得，但係球隊近兩仗表現睇嚟好似冇咩問題。主場硬撼有「超人」懷特侯活、前雷霆第6人夏登同林書豪嘅火箭，雷霆照樣打得出色；全隊命中率高達57%，當中「雷神」杜蘭特17射11中，轟入全場最高33分，仲搶咗13個籃板，得到今季第12個「雙雙」。至於客隊球員手感一般，主力得分手夏登全場只有9次起手機會，得兩球命中，加埋罰球先有8分進賬，超人同林瘋亦同樣冇料到，最後火箭被炒31分，敗走奧克拉荷馬城。
雷神賽後話，冇咗好拍檔在陣始終好難習慣：「佢唔喺度真係好唔同，不過我哋都知要點彌補佢嘅空缺。上年季後賽我哋面對同樣嘅情況，亦得到咗教訓。希望今次球隊可以有所進步，當佢返嚟之後亦唔會出現默契問題。」至於頂替韋斯卜克嘅列治積遜，就話球隊要團結：「我哋要團結一致面對逆境，雖然唔知可唔可能每場都有咁嘅表現，但係我哋會努力嘗試。」
另一邊廂，火箭教練麥希就拒絕以5日4戰嘅賽程為輸波藉口：「𠵱家打籃球之嘛，又唔係要佢哋搬大木頭。今場輸在防守同冇活力。」
足本收睇《亂噏24》x劉嘉玲； 鄭秀文@杜琪峯再度登場！
周一至周五《亂噏24》約定你： http://bit.ly/appletalk24