加斯頓拉美利斯中伏鳥！星期日英超對愛華頓一役，呢位修咸頓中場喺71分鐘幫球隊扳成1:1平手，不過佢興奮得滯，除衫慶祝攞黃牌不特止，仲將件衫畀埋球迷，最弊佢畀嗰個係愛華頓小球迷，對方一於唔畀番件衫佢，而最後球隊亦輸埋1:2，慘情！
小球迷拒還戰利品
主場嘅愛華頓開賽9分鐘就由史密斯高文開紀錄，踢到71分鐘，後備入替嘅加斯頓拉美利斯遠射破網，幫修咸頓追番1:1。呢位烏拉圭中場今季不受重用，坐冷板都坐到硬晒；但撞正呢場修咸頓中前場陣容不整，雲耶馬同舒尼達連分別因傷同停賽唔出得，加上球隊先落後，加斯頓拉美利斯終於有機會後備落場，點知畀佢做埋入球功臣，仲唔一吐烏氣，high到爆咩！
佢嘅心情，我求大俠都好明白，但除衫慶祝係要罰㗎！可能加斯頓拉美利斯寧願食牌都要除衫，因為咁先可以表達到內心嘅興奮。不過，佢仲走埋看台，順手將件波衫畀咗個坐前排嘅小球迷。
焗着冇號碼球衣
據報，呢位着藍色褸嘅小球迷係愛華頓嘅支持者，佢收到加斯頓拉美利斯件波衫後，就收埋佢冇拎番出嚟，完場後仲當戰利品拎返屋企。至於加斯頓拉美利斯只好搵件冇號碼嘅波衫着住先。
但係加斯頓拉美利斯只係開心咗3分鐘，因為愛華頓嘅盧卡古隨即喺74分鐘建功，「聖徒」最終輸1:2，而加斯頓拉美利斯嘅入球亦幫唔到球隊搶分。好彩嘅係，修咸頓領隊普捷天奴賽後冇追究加斯頓拉美利斯亂咁送衫，仲大讚後者狀態好，「其實我唔太清楚佢件波衫去咗邊，佢可能開心到掟咗上觀眾席啩，但我好滿意佢今場嘅表現，見到佢嘅信心不斷增加。踢英超係要時間適應，佢呢場獲派上陣，取得入球，我希望隨住上陣時間增加，佢嘅表現都會越嚟越好。」
足本收睇《亂噏24》x劉嘉玲； 鄭秀文@杜琪峯再度登場！
周一至周五《亂噏24》約定你： http://bit.ly/appletalk24