【絕代芳華】十年思念梅艷芳！昨午梅迷絡繹到九龍塘省善真堂悼偶像，晚上逾24位巨星凝聚灣仔會展舉行「梅艷芳。10。思念。音樂。會」，張學友、劉德華、梁朝偉、劉嘉玲、張曼玉、鍾楚紅、林憶蓮、林子祥、郭富城、許志安、鄭秀文、楊千嬅、陳奕迅、張惠妹等向故友遙送串串思念，星閃閃念當天跟她一起的每天，以歌聲淚影悼阿梅！
大會開場播一段阿梅署名的文字：「當有一天我離開娛樂圈，到底還有多少人能夠真正記住梅艷芳這個人呢？」音樂會發起人學友選唱阿梅成名作《赤的疑惑》，多年沒開金口的梁朝偉主動演繹《朦朧夜雨裡》，摯友劉德華壓軸唱《似水流年》，尾聲眾星大合唱阿梅最後個唱的最後歌曲《夕陽之歌》。
承受極痛
鍾楚紅上台感觸說：「我識阿梅好耐但唔深交，知佢病探佢，單獨相處傾好多偈，Leslie（張國榮）離世對佢打擊好大，佢哋好愛惜對方，好似老夫老妻，唔止一次喺Leslie口中，聽到佢擔心阿梅工作上俾人呃，情路上俾人蝦，阿梅講病情話佢好痛，程度係無法承受嘅痛，學友話識佢咁耐未講痛字，可想而知佢係幾咁強女人。」張曼玉說：「今日好享受又喊又笑諗番20年同阿梅來往，佢係一個好有義氣嘅人，係男人同女人混合體，每次去玩幫我擋酒，梅艷芳係香港人福氣，佢撐得好辛苦，我好欣賞尊重佢。」袁詠儀一身素服說：「我讀書偶像係梅艷芳，06年終於等到合作拍《金枝玉葉2》，佢冇架子，有日收工知張智霖唔喺香港，我係孤兒仔，佢叫我食飯，睇出佢好關心身邊人。」
昨晚8,000觀眾着黑白素服，阿梅舊愛林國斌、師傅寧波車、生前好友曾華倩、連炎輝、岑建勳、劉天蘭等現身悼念，梅媽行紅地毯獲志偉擁抱握手，她交了一個白信封給志偉，之後志偉接受訪問說：「佢個仔（梅啟明）寫畀我同學友，未睇寫乜，梅媽話佢都90歲，多謝我哋為阿梅做咁多。」
採訪：王連連、溫敏芝
攝影：仇志德
足本收睇《亂噏24》x劉嘉玲； 鄭秀文@杜琪峯再度登場！
周一至周五《亂噏24》約定你： http://bit.ly/appletalk24