銀行界朋友請吃午飯，叫去置地廣場銀行家會所，食飯本來冇問題，但在年尾放假狀態，懶懶閒，着咗波鞋返工，點上得去銀行家會所呀？好彩秘書提醒，去年差不多呢個時候，有人約去香港會，自己臨急臨忙衝入馬莎，買咗一對皮鞋穿上，吃過飯後就將對皮鞋放在寫字樓儲物櫃內。秘書好記性，一搵就搵番出嚟，於是可以換鞋，去賓架會所吃聖誕餐。
見到賓架，好自然咁講句Merry Christmas，講完先至覺得，自己有冇政治不正確呢？未去吃飯之前睇霍士電視嘅Bill O'Reilly在節目上大罵美國的「世俗前衛派」（Secular-Progressive簡稱S-P）不准人地講聖誕快樂，只講Happy Holidays，係違反美國人嘅基督教傳統！原來美國有不少地區，已放棄耶穌基督教派傳統，早已不准公立學校只教耶穌聖經而不教導其他宗教，公立學校嘅基督教、天主教式祈禱亦已禁止，以示學校並不優待任何一個宗教，自由派人物如著名搞笑騷主持人Jon Stewart在自己嘅節目The Daily Show與奧拉利對着幹，講Happy Holidays，不講Merry Christmas，是故奧拉利等保守派人物每年在呢個時候就會與S-P派大打一場「耶穌誕文化戰」（Cultural War on Christmas）。
賓架話如果唔係為咗耶穌生日而有耶穌誕（左丁山阿爺嗰一代用語），西方世界每年年尾邊會有咁多假期活動吖，除非香港廢除港英遺留落嚟嘅傳統假日，好似日本、泰國、中國咁在耶穌誕不放假，否則我地講句Merry Christmas其實係尊重事實，並無政治涵義及政治不正確嘅問題，美國人（尤其是民主黨人）喜歡年尾放假，但又要清洗呢個假期嘅耶穌基督涵義，當然與傳統相違背，同保守派人士罵戰，與我地無干，我地一於照講Merry Christmas可也，但到美國旅行或如陶傑所言，到澳洲加拿大旅行，或讀書，或者要謹慎一啲，對方講「聖誕快樂」，自己先至照講，對方講「快樂假期」嘅話，自己亦講一句「快樂假期」，無謂一開始就表現出大家思想不同吖。