卡迪夫城喺上周六英超賽前一日將領隊麥基辭退，球迷對班主陳志遠嘅厭惡程度進一步加深；本來贏波就係沖淡壞消息嘅最佳方法，好衰唔衰卡城喺場波領先兩球下，最後都被新特蘭以2:2逼和，令本來喺場邊手舞足蹈嘅陳生即時冇晒癮兼被噓爆。禍不單行，卡城想搵蘇斯克查（蘇B）接任領隊，隨時俾後者恩師費格遜搞禍，據講老費力勸蘇B唔好接手呢個爛攤子。
被黑貓追和2:2好冇癮
陳生怒炒卡城球員同埋球迷都好撐嘅麥基，喺上周六場波自然被主場球迷猛烈柴台。不過陳生一於少理，繼續貫徹佢嘅衣着態度，身穿卡城紅色球衣、衫尾攝晒入西褲裏面嘅經典造型又再出現。卡城呢場波都踢得好爭氣，佐頓梅治開波冇耐先開紀錄，加上費沙甘保喺58分鐘建功，諗住可以結束兩連敗頹勢，陳生即刻高舉雙手豎起拇指示威。
點知到咗最後階段形勢逆轉，史提芬費查喺半場入替見頭暈要退下火線嘅波連尼，前者喺83分鐘門前建功破蛋；到補時差唔到多夠鐘再由哥爾碧克入波扳成2:2平手。
新特蘭保住1分，令2013年最後一輪英超由13至20位嘅球隊全部都贏唔到波，13位嘅維拉只係領先包尾嘅新特蘭6分，護級形勢認真緊湊。亦因為咁，卡迪夫城拎唔晒3分對佢哋嘅影響認真大，難怪現場球迷見隊波又失分，都將矛頭指向陳生度，噓得更加激烈。
費Sir勸蘇B咪接手
卡城當務之急當然係要搵返位領隊接任，據講佢哋已經同挪超球隊莫迪方面接觸，希望可以羅致到頭號目標蘇斯克查。不過有指蘇B昔日效力曼聯嗰陣嘅領隊費格遜，非常反對佢愛將接受呢份新工。費格遜對蘇B有呢句勸諫：「要先揀個好老闆，唔係揀間好球會。」
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange