【特稿】
當了34年消防員的阿龍指，這一行職業病是「永遠唔會熟睡，已經習慣瞓緊都要意識清醒」，「輕聲到有人放底個杯」都會醒來，一醒就「醒晒」；惟有放假到外地時才能稍為放鬆。
消防員一上班就是24小時，朝九朝九。雖說每晚凌晨為「非活躍時段」，若無事發生，可在房間休息；但一旦有事發生，就須一分鐘內出車。「凌晨一響鐘，間房會着晒燈，你要即刻醒晒、聽廣播睇吓要唔要去車，要嘅就（穿制服）衝落去（消防車）」。阿龍說曾有消防員趕不及上車，要坐的士趕赴現場，會合同袍。「（當值時）沖緊涼響鐘，個身未沖淨梘液就着制服去現場，做消防一定試過」，阿龍曾聽聞有消防員「成頭泡」戴帽工作。
入行前阿龍很「懶瞓」、「掃把拍都唔醒」；但現在他家裏安裝了隔聲玻璃、厚料窗簾，因為少少聲都會醒。平日不管多累，每日早上6時半都會自然醒來，「因為6點55分集隊點名！」也因緊張，阿龍曾鬧笑話。「因為響鐘聲好似酒樓廣播嘅『鄧凳登燈』，仲係消防新仔時，試過喺酒樓飲茶時，聽到『鄧凳登燈』，即時彈起身，俾前輩笑咗好耐」。
《蘋果》記者
足本收睇《亂噏24》x劉嘉玲； 鄭秀文@杜琪峯再度登場！
周一至周五《亂噏24》約定你： http://bit.ly/appletalk24