賣肉不一定姣，性感尤物都可以好有個性，好似曼聯球星湯卡華利，就有個型格索模女友。WAGs賣弄性感，並非C朗俄籍女友艾琳娜專利，聰明仔女友祖芝娜（Georgina Dorsett、圖），日前亦拍攝泳衣照，盡騷驕人身材！未知有心抑或無意，祖芝娜身穿紅色Deep V泳裝，「魔」鬼身材非常誘人，完全睇唔出已經係一女之母，湯卡真係羨慕死唔少男士。
22歲嘅聰明仔一向偏愛大姐姐，早年同大佢兩歲嘅前女友奧哈娜（Emily O'Hara）分手之後，旋即搭上相差6年嘅英國電視真人騷《Towie》女星祖芝娜。唔好以為拍得《Towie》又擁魔鬼身材，祖芝娜就似足《喜愛夜蒲》女角，當年剛加入真人騷嘅祖芝娜，雖然已經被某男參賽者虎視眈眈，但祖芝娜非常有性格表態冇興趣，更斷自己後路，表示唔會同節目參賽者發展。當時23歲嘅祖芝娜仲透露自己唔係蒲精：「節目中好多女仔都鍾意打扮同落club，但我唔係佢哋其中一個，我對夜蒲冇興趣，就算我在場，我都唔覺得自己可以吸引到任何人嘅目光。」
聽落好有性格，不過女士一向口不對心，真唔真就唔知喇。文:呂晨
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange