立法會前議員「金勞詹」詹培忠係賭錢高手，十幾歲就喺潮州鄉下賭錢，賭齡超過50年，遇上長假期，佢好多時都話去美國拉斯維加斯或者過大海。剛過去嘅聖誕長假，佢竟然冇去賭，仲話成年冇賭，冇興趣喎。
金勞詹舊年底喺金鐘被人伏擊，打到眼腫面腫，當時就有人估係同佢經常出入賭場有關。雖然金勞詹話唔關事，但佢真係變乖咗，話好耐冇賭過錢，有幾耐？一年咁耐囉。
佢認為，賭錢都係心魔作怪，「夠有錢，咁就唔使貪人哋嘅錢」，佢已經八個月冇過大海。不過，佢又唔係正式戒賭，只係忽然冇乜興趣咁話。
金勞詹近年喺賭場的確戰績彪炳，其中一次最巴閉，就係佢2008年兩個月內喺澳門賭場同賭船贏咗1.5億元，2009年聖誕節前又喺拉斯維加斯贏過千萬元，認真犀利。
佢傳授過賭博12字真言：「贏谷、輸縮、心清、數熟、夠毒、知足」，可能佢𠵱家就係知足，賭場老闆亦都可以放心晒，暫時少咗呢位高手去贏佢哋嘅錢！
足本收睇《亂噏24》x劉嘉玲； 鄭秀文@杜琪峯再度登場！
周一至周五《亂噏24》約定你： http://bit.ly/appletalk24