2013年係香港嘅大時代，同當年嘅TVB神劇《大時代》一樣以一場跳樓戲揭開序幕。劇情講述野心勃勃嘅689狼英奪得特區揸fit人嘅寶座後，對頭馬尖啤劉夢熊用完即棄。尖啤不忿，大爆狼英黑幕，仲矢言若經不起測謊機考驗，就由ifc跳落嚟。全城金睛火眼哺喺ifc窗前，食花生等睇呢場測謊戲。
鏡頭一轉，港人好怕永世不見真普選，法律界學者戴耀廷提出佔領中環，土共派出淨心BB化身愛港力戰隊保衞地球……以上片段唔係做戲，八方趁年尾，將每月真人真事當電視劇一連兩日介紹。集集荒謬得嚟又真實、真實得嚟卻悲壯，精采程度拍得住《警界線》，只不過，故事發生喺你同我身邊，如有雷同，實屬不幸！
第1集：易尖啤ifc企跳
時間：2013年1月26日。地點：ifc個天台。新年流流，尖啤透過《陽光時務週刊》大踢爆，揭發狼英喺山頂大宅僭建一事上，虛構曾委派專業人士驗樓。走入絕路嘅尖啤話因為狼英恩將仇報，故要「鳴槍示警」，仲聲稱有猛料可拉狼英落馬，又指自己句句屬實，單挑大話狼英，矢言邊個通過唔到測謊機嘅測試，就由樓高415.8米嘅ifc天台跳落嚟！查實尖啤咁神勇，一嚟因為冇得入行會，二來狼英冇推薦佢做政協常委，三來更因為佢俾老廉調查。結果佢今年出庭做被告，多過去酒會做嘉賓。
第2集：「你呃人」Hit爆
時間：蛇年將至。地點：維園年宵。狼振英呢隻大話精，令到繡上唐唐名句「你呃人」嘅咕𠱸，喺年宵一炮而紅。攝影機由ifc天台zoom番去維園，見到狼英首次以特首身份去做騷，卻變成過街老鼠，遭大批示威者狙擊，「下台、你呃人」之聲響徹年宵市場。社民連長毛梁國雄攞住「你呃人」咕𠱸擁前抗議，狼英夫婦最終被迫腰斬行程，敗走維園。長毛仲喺立法會聚餐食過翻尋味，成功爭取將「你呃人」咕𠱸展示喺狼英背後。
第3集：AO處長「亂港」
眼見狼英黑暗時代來臨，真普選凍過水，港大法律學者戴耀廷決定瞓身搞佔領中環，爭取符合國際標準嘅普選方案，準備打一場硬仗。另一邊廂，狼英黑手再次伸入香港電台，AO廣播處長鄧忍光執行政治任務，繼炮轟港台節目《城市論壇》展示空凳諷刺教育局局長吳克儉有唔妥後，再出手批評《頭條新聞》諗過吓用納粹德國諷刺中共嘅諗法不當，要求員工做「思想交代」。港台員工感到受屈，痛斥呢件AO處長手段卑鄙。
第4集：愛港戰隊出動
愛護香港力量四出到政制研討會踩場搗亂，最矚目嘅一場莫過於淨心BB罔顧市民安全，多次踩上枱揮動國旗區旗。另一場由真普選聯盟搞嘅政改研討會，又因為愛字頭踩場叫囂，研討會被迫腰斬。土共勢力步步進逼之際，民主黨創黨主席李柱銘拋出特首普選方案，建議2017年維持選舉委員會1,200人提名模式，讓獲最多提名的五人都能成為候選人，確保泛民入閘，方案被斥如同接受篩選，李柱銘致歉兼收回方案，形容自己老貓燒鬚。
第5集：行會提早收工
年中正值香港多事之秋，狼英竟以「冇嘢傾」為由，突然將行會休息一天，情況好似古時君王不早朝，令人擔心行會進入冇嘢做狀態。難怪唐營悍將林大輝當頭棒喝話：冇嘢傾，咪傾吓點解狼英民望咁低囉。亦有人質疑狼英只係替當時欠債纍纍、時任行會成員嘅頭號梁粉張震遠解圍，等佢可以避開吓傳媒。點知呢，張震遠當日真係決定請辭所有公職，迎接浪接浪嘅追債官司。喺呢秒睇番轉頭，尖啤年初爆嘅料，可能經得起測謊機考驗喎！
第6集：演藝生藐狼英
狼英上個月冇乜嘢好做，於是趁夏日炎炎，走到花旗國搞吓外交囉。首次外訪嘅佢，出師不利，慘食美國檸檬。佢訪美期間，紐約市長彭博喺佢抵埗前，突然取消會面。事件鬧大後，美方突然安排彭博同狼英低調喺酒店閉門見面40分鐘，但不設傳媒採訪，搞到狼英好辳。狼英返到香港，主持演藝學院畢業禮，畢業生就喺屬於佢哋嘅舞台上，向狼英豎中指、打交叉手勢、大叫689下台招呼佢。
李八方
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange