長和系接班人、即係超人李嘉誠長子李澤鉅（Victor）以精於鍊數見稱，估唔到連公佈全年業績嘅日期都有得鍊！
往年長實（001）、和黃（013）都係3月底公佈全年業績，今年竟然提早喺2月27號（周四），對上一次最早公佈全年業績係2004年3月18日。
即使提早咗，長實、和黃都唔係最早公佈業績嘅藍籌股，同系電能（006）、港交所（388）早過佢哋。市場亦關心，今次有冇業績記者會，事關超人今年喺長和股東會同中期業績都冇見記者。
超人早前接受內地傳媒訪問時表現精靈，乜都講，冇理由咁厚此薄彼㗎？暫時唯一肯定係，長實、和黃提早公佈業績，股東可提早收息。
記得長實舊年換走用咗40年嘅核數師德勤．關黃陳方會計師行，跟和黃一齊用埋羅兵咸永道，長實執董兼掌櫃葉德銓當時預告，統一核數有助提早公佈業績，真係即刻做嘢。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange