收爐味道越來越濃，上周五全日成交400億唔夠，但個別板塊如半新股及醫藥股依然炒得火熱，挾着雙重身份嘅鳳凰醫療（1515）乘勢抽升半成，喺擁有業務獨特、增長強勁及貨源歸邊三大賣點下，絕對有潛力做明年爆升股。
鳳凰醫療係首隻喺本港上市嘅純醫院股，截至今年6月底止，共經營11家綜合醫院、1家中醫院及28家社區診所，共計3,213張營運床位，以去年營運床位計，更加係全國最大私立醫院集團。由於醫院設備及醫護人員質素，高過公立醫院幾班，加上以北京為基地，絕對食正強國人富起來嘅龐大需求。
睇番鳳凰醫療近三年盈利，複合增長率高達50.3%，認真利害。上市集資約12億銀，當中逾三成將用作併購，雖然明年預測市盈率達41倍，但集團正向做大做強目標一步一步進發，今日嘅高估值，只會變成明日嘅低估值。
鳳凰醫療公開發售一手中籤率達100%，明顯向散戶傾斜，但上市後照爆升，反映基金搶貨積極，經過一個月嘅收集，貨源相信已盡落大戶手上。睇圖表，鳳凰醫療橫行近半個月後，上周終以大陽燭衝穿12元大關，再度逼近上市高位，成交更大增近三倍，聰明錢儲貨等爆升不言而喻，明年目標價直指20元，潛在升幅65%，達標難度不大。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange