中信泰富(267)前主席榮智健似乎黑氣未消。佢當年憑馬王「活力先生」、「奔騰」叱咤馬場,自從公司2008年爆出炒燶外匯accumulator後,佢就幾乎絕迹馬圈。難得噚日新馬「飛影」首度出賽,老友金管局前總裁任志剛專誠捧場,點知隻馬入閘前發癲,起擒後撻落地,跑唔成!
榮太子近期活躍番,剛夥拍太古地產(1972)向中信泰富收購港島東大昌行商業中心全幢物業,噚日又有新馬出賽,令佢有機會現身馬場,幾位老友任志剛、終審法院前首席法官李國能、醫學專科學院院長李國棟亦到場打氣。任總、兩位李生與榮智健千金榮明方之前養過隻團體馬叫「飛燕」。
開跑前,幾位喺沙圈同會員席談笑風生,對飛影相當有信心,等拉頭馬咁款。無他嘅,飛影之前喺澳洲三戰三勝,來港評89分起步,被譽為本地中短途明日之星。噚日跑第十場,賠率由隔晚熱到臨場,一直企硬四倍左右。
經獸醫驗證退出賽事
可惜人算不如天算,在港未跑過嘅飛影入閘前,大發脾氣擰頭擰髻,卒之起擒將騎師安國倫拋下,然後失平衡成隻馬撻落地,雖然冇走甩,但經獸醫驗過,認為不宜出賽,最終退出跑唔成。
榮太子喺會員席見到此情此景尚算冷靜,佢三位老友就難掩錯愕兼失望之情!
今年10月,羅傑承隻「軍事機密」閘前發老脾又衝閘又拋跌騎師,都要照跑,結果出閘脫腳跑包尾大熱倒灶。軍事機密至今未復出,飛影幾時出賽,讓榮太子再嘗拉頭馬滋味,真係要拭目以待。
李華華
mailto:[email protected]
足本收睇《亂噏24》x劉嘉玲; 鄭秀文@杜琪峯再度登場!
周一至周五《亂噏24》約定你: http://bit.ly/appletalk24