昔日嘅榮智健叱咤風雲，曾經係中資紅籌巨人，喺政商界人人畀面佢；喺馬場榮智健亦威風八面，養過唔少頂級好馬㗎，「活力先生」、「奔騰」、「掌門」、「奧運精神」等贏過唔少大賽，「活力先生」更係95至96年度香港馬王。不過人生總有起跌，幾年前榮智健嘅中信泰富炒燶外匯，公司慘蝕百幾億，榮智健同佢嘅頭馬范鴻齡，因此敗走中信泰富，雙雙離開，可以話係榮智健嘅人生谷底。而近年佢嘅養馬運亦一般，贏馬寥寥可數。
不過靜咗幾年嘅榮智健，最近活躍起嚟，夥拍太古等大公司，合資39億收購一幢商業中心。馬圈方面，佢亦轉趨積極，家陣有「飛神」、「飛影」、「飛龍」三匹現役馬。其中「飛影」出戰禮拜日二班千四米，呢匹馬喺外地三戰三勝未逢敵手，最近在港試大閘亦走勢良好，備受圈內人重視。如果今次初出即贏，唔通就代表榮智健開始全面轉運？
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange