冇辦法，體育粉絲本來就有數字歧視，對單字冇乜好感，對雙數特別敏感，所以呢送別2013實在冇乜離愁別緒，至於迎接2014，話晒有個森巴嘉年華等緊你，所以倒數得嚟硬係多些少肉緊。
冇幾耐之前嘅2012年，係好鬼難過嘅一年，因為年尾流流有個末日預言等緊大家，所以嗰一年特別多咗啲危機感，亦因為咁紅咗王菀之嘅一首《末日》：「如果禍與福都躲不過，就每天當沒明天，捉緊愛人過……」浪費咗啲擔心，賺番些少愛人抱抱，查實除笨有精。
2013好似少咗呢啲危言聳聽，又或者係日日都已經好似末日咁過，過到大家麻木到聽見歌神同吹神晚晚唱到激情慷慨都冇乜反應，「人生總有歡喜，難免亦常有淚……」唔使講都知啦，我哋係香港人嘛，習慣咗苦中作樂，據講今年過節食肆生意大旺，怕且就係大家化悲憤為食量嘅表現。好在今年年尾都好好醜醜砌到一個一生一世1314嘅moment出嚟，咁大家喺今年最後一刻喺facebook又多一張自拍可以呃like嘞！
英超入面嘅南韓兵越來越少，但影響我哋生活嘅南韓人就越來越多，2012年有位肥佬跳舞叫PSY；2013年就輪到曾經係肥婆嘅鄭多燕，本來減肥就算整容都唔見特別，偏偏佢背後有一個令人動容嘅生活故事，生完兩個之後諗住養尊處優，俾老公一句「真懷念你以前的身材啊！」而決心keep fit。喺香港講同一句話，恐怕只會換來一堆「冇良心呀你」嘅對話，肥減不了，交就有排拗。
今年香港倒數有鄭多燕，可能象徵大家可以擺低唔想再要嘅肥肉，喺雙數年重新做個fit人！呢種死到臨頭終極反底嘅故事係人都鍾意，但做得到又有幾多個，反而你個個星期睇住嘅英超可能仲值得學習，人人放假佢就加開快車，居安思危嘅勤奮程度厲害過劉華，keep fit並唔係肥人專利嘛。
新一年係偷懶好藉口？定發奮是時候？睇完英超瞓醒先講啦。
KEYMAN
now TV主持
足本收睇《亂噏24》x劉嘉玲； 鄭秀文@杜琪峯再度登場！
周一至周五《亂噏24》約定你： http://bit.ly/appletalk24