【銅鑼灣】聖誕節期間好多藝人都出咗埠，不過蘇永康選擇留喺香港，連日嚟都去咗銅鑼灣行街。前日下晝兩點幾，着到靚靚戴墨鏡同着住長褸嘅康仔一個人沿住利園山道一帶行街，身為溥儀眼鏡店代言人嘅蘇永康，竟然上咗棟商業大廈，去咗另一間連鎖眼鏡店睇眼鏡，相信佢係去打聽敵情。
狂試眼鏡
入到店佢對櫃入面嘅太陽眼鏡好有興趣，職員攞咗超過4款鏡架畀佢試，貪靚嘅康仔不停對住塊鏡左照右照。試咗大概十分鐘，佢由職員帶咗入店入面，相信係順便驗埋眼，其間康仔都唔放過試眼鏡嘅機會，再叫職員拎咗7、8副到入面試。
康仔喺間連鎖眼鏡店入面，逗留咗差唔多一個鐘，最後都係空手而回，睇嚟佢刺探軍情嘅任務已經完成，所以佢好輕鬆咁落樓離開，見到記者影相，仲心情大靚走埋嚟打招呼講咗句「聖誕節快樂」。女人行街唔可以空手而回，身為男人嘅康仔都一樣，佢跟手行咗入著名嘅涼果店么鳳，買咗啲中式零食同涼果，臨走仲分甘同味請記者食咗包柑桔應節。
採訪、攝影：徐錦池
足本收睇《亂噏24》x劉嘉玲；鄭秀文@杜琪峯再度登場！
周一至周五《亂噏24》約定你： http://bit.ly/appletalk24