熱戀時，愛侶都會為對方傾出全力去愛，那一刻會感覺自己是最偉大的人，然而這份愛也許仍然會有所保留，怎樣才能達到愛得毫無保留，曾提名金馬影后的林嘉欣，在情路上全情投入，直至她經歷了懷孕及組織家庭後，嘉欣才領悟到徹底、無條件、無保留的愛是怎樣感覺。
撰文：馬建華
三年多前，林嘉欣跟當時仍是男友的導演袁劍偉沐浴愛河中，她完全沒想過三年多後的今日，她已是兩女之母，從忙碌於日夜顛倒的娛樂圈工作，變成作息有序的媽咪生活，即使如此，嘉欣從心而發說：「我覺得我開心咗好多，𠵱家生活好滿足，以前拍拖時幾愛都好都會有保留，𠵱家對兩個囡囡同家庭嘅愛係冇保留。」
生細女感覺奇妙
嘉欣大前年10月誕下大女Kayla，今年5月再誕下細女Sofie，嘉欣坦言兩個囡囡的來臨都是意外的，她笑指本身對任何事都無特意去安排，一切隨緣。再度懷孕，嘉欣透露懷着細女Sofie時曾遇過見血作小產情況，憶述陀着Sofie時的心情，嘉欣充份展現母愛的一面：「做咗媽咪之後，我對生命有咗完全唔同體會，BB經過十個月懷孕到出世，係一個好難忘嘅奇妙過程，尤其係今次生阿妹時，中途遇過見血，成個過程冇第一次咁順利，我當時同自己講，每個生命都有佢自己命運，無論結果點都要放鬆去面對，直至阿妹出世後，我就更懂得勇敢去面對一切，更加識得珍惜身邊每一件事物，而我亦都係一個好幸運嘅人，我係冇任何嘢再值得去怨。」同一樣是十月懷胎，給予嘉欣的領悟又再度昇華。
嘉欣沒想過自己會當上全職媽媽，跟自己的小孩相處，她直認女兒是她的老師，因為生活上點滴相處，正所謂童言無忌，女兒的說話是最直接及純真的，一切一切都令嘉欣對人生有所啟發，她舉了一個例子說：「若果畀一張畫紙大人，大家會先構思再起稿，然後先落筆去畫，不過小朋友就唔會咁，我畀張畫紙家姐，任何大細size，佢都會冇規則自由去創作，其實咁先可以得到最大歡樂，正如演戲同創作都要一樣。」她笑指每逢接大女Kayla放學時，若果老師指Kayla的畫作帶點狂野時，她不期然會微笑，因為她毋須女兒名列前茅，但最重要是在對的路上走出自己天地。
親子專欄留回憶
現在嘉欣生活時間主要以家庭及女兒為主，強調遇到合適工作仍會接，才能與時並進，近年她撰寫一個親子專欄，主要是分享跟Kayla看過的親子讀物，嘉欣笑說：「好享受同家姐講故事時間，其實好多書都睇過好多次，但每次佢都睇得入神又好投入，所以都想同大家分享我哋睇過嘅書，若果將來有機會都希望出一本分享故事書嘅書，亦好似為我同家姐嘅經歷留一個回憶。」
講到Kayla每次聽故事都會極投入而七情上面，囡囡會否繼承她的演藝細胞？嘉欣坦言不會局限兩女兒將來的路，讓她們自由發展，但不會刻意讓她們入行，她說：「睇佢嘅興趣去做，我心底當然唔希望佢哋入行，因為娛樂圈壓力大，兼且要成功係好難，一百個人裏面可能只得一兩個，付出同收穫唔會係正比。」短短的幾句內心話充份感受到嘉欣只想Kayla與Sofie，在快樂空間中自由健康成長。
屋企冇電視
林嘉欣為了女兒，跟丈夫袁劍偉日常生活上要有所放下，嘉欣說：「我屋企係冇電視，係no tech（無科技產品）家庭，平時喺屋企我會將電話熄做靜音兼放埋一邊，同事朋友搵我都係以短訊為主，等小朋友休息時我先拎電話出嚟覆，電腦就會等佢哋瞓咗先用，老公都會盡量配合。」
時下小朋友難以避免接觸平板電腦或智能電話，嘉欣坦言Kayla見到其他小朋友玩都會看及想參與，但她會跟女兒解釋暫未適合使用。小朋友會反叛，幸好嘉欣跟Kayla一直建立良好溝通方式，彼此信任，嘉欣說：「老公不時會睇書，若果適合我哋同小朋友，就會介紹我睇，平時我哋亦會盡量夾到有一個人喺屋企陪住小朋友，好似我要出席活動，老公就留喺屋企，所以我哋照顧小朋友時間都差唔多。」
化妝：Will Wong
髮型：Hin Wan of ilcolpo
服裝：Moiselle
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！