根據林奮強之「黃金五十」做嘅報告，香港未來二十年極度缺乏醫院，病牀及醫生，將來不排除會出現富翁老人為病牀移民，貧窮老人在醫院牆外瞓臨時帳幕嘅情況。梁振英成日話「適度有為」，其實講嚟講去只係識講起公屋，唔講為新公屋區配置新醫院，好似公屋居民係鐵打嘅，唔會病嘅，例如大埔一幅私家醫院用地因投標流標，政府就立即收回用嚟起屋，一啲都唔諗吓，私人興建私家醫院負擔不了地價，點解政府唔將幅地用來興建大埔公立醫院，以配合將來新界東北發展，大量居民入住？
現時有報導話啟德有五公頃吉地，可作醫院用途，政府考慮將老化、擠逼不堪嘅伊利沙伯醫院在此重建（一位在伊院實習過嘅醫生講俾左丁山聽，佢入病房要用「輕功」跨過外面嘅病床），但又有人話現時伊院有七公頃咁大，新地皮只得五公頃，唔夠用噃，此乃技術問題箒，機場早已搬走多年，啟德地起醫院，增加地積比，將主樓起到三十層高又有何不可，只怕冇地啫！如果政府真的要有為，高永文真的有魄力的話，應該藉此良機，作二十年規劃，首先在啟德興建同樣樓面面積或更大嘅新伊利沙伯醫院。第二步就係將廣華醫院暫時搬入伊院，拆掉、重建非文物古蹟部份嘅廣華醫院，完成之後，廣華搬回原址，拆掉舊伊利沙伯醫院，改建成一間更大型嘅九龍中全科醫院。
如此一來，二十多年後，九龍有三間新建醫院，服務人群，豈不善哉。最要反對又反對嘅，當然係將伊院搬往啟德，然後在原址興建任何種類嘅房屋。
起多啲醫院，自不然諗起醫生何來，梁振英不要自誇有為呀，除非佢夠膽限制香港醫學會嘅權力，大力引入外來合資格醫生，第一批好容易箒，就係在英聯邦國家服務嘅香港人醫生，第二批就係在世界上前一百名醫學院畢業嘅醫生，可免試來港就業。第三批當然就係從速增加兩間大學嘅醫學院學額。