熱火前鋒勒邦占士今年9月先同青梅竹馬嘅女友莎雲娜結婚，但「大帝家」好快再有喜事。美國狗仔網站上周六爆料，「皇太后」歌莉亞已經答應饒舌歌手Da Real Lambo求婚，準備下年春天結婚，但呢對老妻少夫難免畀人女尊男卑同黐金糠嘅感覺。
占士下星期一就過29歲生日，佢媽媽歌莉亞都唔算好大年紀，今年只係44歲。了解大帝出身嘅球迷都應該知道，單親媽媽歌莉亞含辛茹苦打幾份工養大占士，所以大帝出名孝順，一直畀母親過奢華生活。
準後父係二打六rapper
上周六美國網站《terezowens.com》爆料，歌莉亞答應咗31歲饒舌歌手Da Real Lambo求婚，仲準備出年春天結婚。占士似乎幾接受呢位只大佢自己2年幾嘅未來後父，好似佢9月去歐洲度蜜月，都帶埋阿媽同Da Real Lambo去；佢上季再拎總冠軍，特別訂做多幾隻有鑽石嘅仿製品畀家人，Da Real Lambo一樣有份。
要「嫁入」帝王家始終有壓力，Da Real Lambo講真只算係二打六，但佢朋友就澄清話，佢做演藝工作都撈得好掂，從未用過歌莉亞錢！不過美國傳媒肯定咬住女尊男卑呢個point唔放，睇吓佢頂唔頂到壓力啦。
占士就快多個後父，開唔開心就未知，不過上周五似乎就唔多happy，事關熱火作客西岸弱旅帝王，球隊托大下收起獲迪、阿倫等主力，單靠勒邦占士獨取33分，戰至加時以103:108輸波，錄得今季第7場敗仗。大帝唯一安慰，係累積得分超越名宿布特同披頓，升上NBA歷來第29位。
足本收睇《亂噏24》x劉嘉玲； 鄭秀文@杜琪峯再度登場！
周一至周五《亂噏24》約定你： http://bit.ly/appletalk24