與羅霖同屆的91年亞姐第五名王瑋，曾參演周星馳的電影《賭俠》，扮演風騷夜總會小姐，大晒37吋巨咪，不過04年她突然息影，隨圈外男友到加拿大生活，有傳她秘密結婚，育有6歲兒子。近日王瑋獨自回流香港，有指她離婚，並打算下月接囝囝返港定居。
安排囝囝入小學
記者昨日致電王瑋，她坦白承認：「我同男友冇正式結婚，但我哋係有個囝囝，𠵱家6歲。我同男朋友因為性格唔啱，決定大家分開，我已經離開咗香港成十年，好想返番嚟呢度生活同工作，我想囝囝學吓中文。我就做先頭部隊返嚟搵屋同搵學校，安頓晒一切，下個月就接囝囝返嚟，佢會插班入讀普通小學嘅小一。」
王瑋決定母兼父職照顧囝囝，她說：「我喺香港仲有爸爸，佢可以幫吓我手。」王瑋有意復出娛圈發展，碰上香港電視明年開台，發展流動電視頻道，now和有線也獲免費牌照，視圈需要多元化藝人，王瑋說：「咁我返得嚟真係啱，我有興趣拍劇、唱歌同登台，邊間搵我都會去試吓。」王瑋剛過去的聖誕節參加了寶珮如的派對，失戀的她乘機輕鬆一下，並謂不急於覓第二春。
採訪：比華利
話你知：亞姐情路坎坷
歷年來不少亞姐選美後，很多都是表面風光，原來情路都如王瑋般崎嶇不平。
黎燕珊
85年第一屆亞姐冠軍，92年與劉永結婚，育有一子一女，後傳出黎遭劉虐打，04年離婚。
羅霖
91年亞姐冠軍，96年嫁給富商劉坤銘，育有3兒，去年因性格不合分居。
陳綺明
92年最完美體態獎及最上鏡小姐獎得主，93年與名導演朱牧之子朱濤秘婚，95年離婚時傳二人大打出手。
黎淑賢
95年亞姐亞軍，98年與盧惠光奉子成婚，育有兩子，06年離婚後嫁美容醫生許智政，再誕下兩子，早前傳婚變。
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！